ताजा खबर

पुष १४ देखि पोखरा कप अन्तर क्लव स्तरिय खुला पुरुष भलिबल प्रतियोगिता हुने

दीननाथ बराल
पोखरा १८, मंसिर

आउदो पुष १४ गते देखि पोखरा कप अन्तर क्लव स्तरिय खुला पुरुष भलिबल प्रतियोगिता २०८० हुने भएको छ । आउदो पुषको १४ देखि १६ गतेसम्म पोखरा ६ लेकसाइडमा रहेको बसुन्धरा पार्कमा उक्त प्रतियोगिता हुने भएको सोमबार पोखरामा आयोजित पत्रकार भेटघाट कार्यक्रममा जानकारी गराइएको हो ।

रेवान पोखराको २५ औं सडक महोत्सवको अवसरमा उक्त प्रतियोगिता हुने भएको पोखरा महानगरपालिका भलिबल संघका अध्यक्ष राम बहादुर लामिछानेले बताउनु भयो । प्रतियोगितामा करिब १२ टिमको सहभागिता हुने आफुहरुले अपेक्षा गरेको उहाँले जनाउनु भयो । पोखरा महानगरपालिका भलिबल संघको आयोजना, पोखरा महानगरको प्रबद्र्धन, पोखरा महानगरपालिका खेलकुद विकास समितिको समन्वयमा उक्त प्रतियोगिता पहिलो पटक हुन लागेको हो ।
प्रतियोगितामा विजेता टिमले नगद १ लाख ११ हजार १ सय ११ र उपविजेताले टिमले भने ७७ हजार ७ सय ७७ को साथमा शिल्ड, मेडल तथा प्रमाणपत्र प्राप्त गर्ने भएको छ । त्यसै गरी प्रतियोगितामा उत्कृष्ट खेलाडीलाई नगद १० हजार प्रदान गरिने भएको छ भने विभिन्न विद्यागत रुपमा उत्कृष्ट हुने वेष्ट स्पाइकर, वेष्ट सर्भर, वेष्ट सेटर, वेष्ट डिफेन्डर र वेष्ट ब्लकरलाई जनही नगद ३ हजारका साथमा ट्रफी र प्रमाणपत्र उपलब्ध गराइने भएको सचिव युवराज गुरुङले बताउनु भयो ।

प्रतियोगितामा क्लवहरुले एक टिममा दुई जनासम्म राष्ट्रिय खेलाडी समावेश गर्न पाउने भएका छन्। ‘स्रस्टालाई सम्मान, नयाँ पुस्तालाई प्रोत्सहान’ भन्ने मुल नाराका साथ आयोजना हुने उक्त प्रतियोगिता सम्पन्न गर्न करिव ८ लाख ९० हजार रुपैयाँ खर्च लाग्ने आयोजकको जनाएको छ । खेलाडीहरुलाई आफुभित्र अन्तर्निहित खेल प्रतिभा र क्षमता प्रस्फुटन गर्ने महत्वपूर्ण अवसर प्राप्त हुने अध्यक्ष लामिछानेले बताउनु भयो । उक्त सडक महोत्सवको अवसरमा हुने उक्त खेलमा करिब २० हजार दर्शकले खेल अवलोकन गर्ने भएको भलिवल खेलाडी सविन गुरुङले एटुजेडलाई बताउनु भयो ।

Related posts