मेलबर्न, २०७२ श्रावन ९,
प्री सिजन टुरमा स्पेनिस क्लब रियल म्याड्रिडले शुक्रबार शानदार जित हात पारेको छ। इन्टरनसनल च्याम्पियन्स कपमा रियलले बलियो इङ्लिस क्लब म्यानचेस्टर सिटीलाई ४-१ गोलले हरायो।
रियलको जितमा करिम बेन्जेमा, क्रिस्टियानो रोनाल्डो, पेपे र डेनिस चरिसेभले एकएक गोल गरे। म्यान सिटीका तर्फबाट एकमात्र गोल याया टुरेले गरे। पहिलो हाफमै ३-१ गोलको अग्रता लिएर रियलले बलियो प्रभाव प्रदर्शन गरेको थियो।
स्पेनिस क्लबको प्रदर्शनमा स्टार खेलाडीबीच तालमेल देखिएको थियो। गारेथ बेलको पासमा बेन्जेमाले २१औं मिनेटमा रियललाई अग्रता दिलाएका थिए। त्यसको चार मिनेटपछि रोनाल्डोले टोनी क्रुसको पासमा गोल थपे।
४४औं मिनेटमा रक्षक पेपेले इस्कोको पास सदुपयोग गरेपछि रियल खेलमा ३-० गोलले अगाडि बढेको थियो। पहिलो हाफको इन्जुरी समयमा टुरेले पेनाल्टीमार्फत गोल गरेका थिए । तर म्यान सिटी खेलमा फर्कन सकेन।
मेलबर्न मैदानमा करिब ९९ हजार दर्शकअघि खेलिएको यो खेलमा इङ्लिस प्रिमियर लिगकै सर्वाधिक महँगा खेलाडी रहिम स्टर्लिङ प्रभावहीन देखिए। प्री सिजन टुरअन्तर्गत यसअघि म्यान सिटीले एएस रोमालाई टाइब्रेकरमा पराजित गर्दा स्टर्लिङले क्लबका लागि डेब्यु गर्दै निर्धारित समयमा एक गोल गरेका थिए।
म्यान सिटीले स्टर्लिङलाई अर्को इङ्लिस प्रिमियर लिग क्लब लिभरपुलबाट केही साता अघिमात्र ४९ मिलियन पाउन्ड स्थानान्तरण मूल्यमा भित्र्याएको थियो। रियलले आफ्नो पहिलो रोजाइका धेरै खेलाडीलाई म्यान सिटीविरुद्ध उतारेको थियो।
रियलका प्रशिक्षक राफेल बेनिटेज टोलीको प्रदर्शनमा सन्तुष्ट देखिएका छन्। गत सिजन कार्लोस एन्सेलोट्टीले कुनै सफलता दिलाउन नसकेपछि रियललाई उनलाई बर्खास्त गरी सिजनको अन्त्यमा लिभरपुलका पूर्वप्रशिक्षक बेनिटेजलाई भित्र्याएको थियो।
पछिल्ला केही सिजन इङ्लिस प्रिमियर लिगको उपाधिका लागि दाबेदारी गरिरहेको म्यान सिटीको यो प्रदर्शनपछि क्लबका प्रशिक्षक मानुयल पेलग्रिनी भने असन्तुष्ट देखिए।
स्रोत : अन्नपुर्ण पोस्ट
