२०७२ ,असार २५,
केही साताअघि मात्रै अमेरिकी जाइन्ट कम्पनी एप्पलसँग पैंठेजोरी खेलेर चर्चामा आएकी अमेरिकी पप गायिका टेलर स्विफ्ट यतिबेला भने सर्वाधिक छिटो एल्बम बिक्री गराउन सफल भएकी छन् । गतवर्षको अक्टोबरमा रिलिज गरिएको उनको एल्बम ‘१९८९’ ले नयाँ इतिहास रचेको हो । उक्त एल्बमले अमेरिकामा सर्वाधिक छिटो ५० लाख बढी प्रति बिक्रीको रेकर्ड बनाएको हो । उक्त एल्बमले रिलिजको पहिलो सातामै झन्डै १३ लाख बिक्री भएर गतिलो बिक्रीको छनक देखाइसकेको थियो ।
त्यसो त स्विफ्टका लगातार तीन एल्बमले रिलिजको पहिलो सातामै १० लाख बढी प्रति बिक्रीको रेकर्ड बनाइसकेका छन् । ‘१९८९’ एल्बम गतवर्ष पनि अमेरिकी बजारमा सबैभन्दा बढी बिक्री हुनेमा परेको थियो भने यसपटक उक्त एल्बम अमेरिकी बजारमा दशकयताकै सर्वाधिक छिटो ५० लाख बिक्री भएको हो । ३६ साताभित्रमा ‘१९८९’ विश्वव्यापी रूपमा भने ८६ लाख बढी बिक्री भइसकेको छ ।
संगीत बजारमा टेलर अत्यधिक सफल गायिका मानिन्छिन् । उनका सबै एल्बमले व्यापारिक सफलता हात पारेका छन् । ५० लाख बिक्री पुग्ने उनका एल्बममा ‘१९८९’ तेस्रो हो । यसअघि सन् २००८ मा रिलिज भएको ‘फिअरलेस’, २००६ मा आएको डेब्यु एल्बमले बिक्रीमा क्रमश: ७० लाख र ५५ लाख प्रति पार गरिसकेका छन् । टेलर स्विफ्टले अडेलीको ‘२१’ एल्बमको सर्वाधिक छिटो ५० लाख बिक्रीको रेकर्डलाई तोडेकी हुन् । यसअघि ‘२१’ ले ५० लाख बिक्रीको कोसेढुंगा ४२ सातामा पूरा गरेको थियो । त्यसैगरी उनको म्युजिक भिडियो ‘ब्ल्याक स्पेस’ ले पनि यसै साता सर्वाधिक छिटो एक अर्ब हेरिएको रेकर्ड बनाएको छ ।
स्रोत : कान्तिपुर
