एक हप्तामा १६८ पर्यटक अन्नपूर्ण पदमार्गमा
दिननाथ बराल
पोखरा, २०७२ असार २४,
वैशाख १२ गते आएको बिनाशकारी भूकम्पले गर्दा नराम्ररी खस्केको पर्यटन क्षेत्र विस्तारै बृद्धि हुन थालेको छ । भूकम्पले गर्दा प्रभावित भएका स्थानहरुमा उद्धार र राहतको काम सके पछि जनजिवन सामान्य अबस्थामा फर्केसंगै पर्यटन व्यावसायमा समेत नयाँ आसा पलाउन थालेको छ ।
विश्वकै उत्कृष्ट पदमार्गमा पर्ने अन्नपूर्ण पदमार्गमा आउने पर्यटकको सङख्यामा समेत बढ्न थालेको छ । वर्खायाममा खासै पदयात्रा नभए पनि भूकम्प पछिको पछिल्लो एक हप्ता देखि अन्नपुर्ण पदमार्गमा विभिन्न राष्टका पर्यटकहरु पदयात्रामा निस्कन थालेका छन । अन्नपुर्ण संरक्षण आयोजना ए–क्यापले दिएको जानकारी अनुसार जुलाई एक देखि ७ तारिख अर्थात असार १५ देखि २२ गतेसम्म एक हप्तामा काठमण्डौबाट भन्दा पोखराबाट धेरै पर्यटकहरुले अन्नपूर्ण पदमार्गमा जानको लागि प्रबेश शुल्क तिरेका छन । ए–क्याप पोखराका प्रमुख लाल प्रसाद गुरुङका अनुसार एक हप्तामा काठमाण्ठौबाट ५४ जना र पोखराबाट १ सय १४ जना पर्यटकहरुले अन्नपूर्ण पदमार्गमा जानको लागि प्रबेश शुल्क तिरेका छन । उक्त पर्यटकहरु मध्य पोखराबाट अन्नपुर्ण पदमार्गमा जाने ७२ जना भारतीय पर्यटकहरु रहेको गुरुङले जनाए । प्रमुख गुरुङका अनुसार गत बर्षको जुनमा मात्र ६ हजार ४ सय ५३ जना अन्नपूर्ण पदमार्गमा पर्यटकहरु गएका थिए भने यस बर्षको जुनमा ६ सय १२ जना मात्र पर्यटकहरुले भ्रमण गरेका छन ।
गत बर्षको मेमा १० हजार ७ सय ८१ जना पर्यटकहरुले अन्नपुर्ण पदमार्गमा भ्रमण गरेकोमा यस बर्षको मेमा भने १ सय ४७ जनाले मात्र भ्रमण गरेका छन । गत बर्षको अप्रिलमा भने १४ हजार ३ सय ६ जना पर्यटकहरुले अन्नपुर्ण पदमार्गमा जानको लागि प्रबेश शुल्कः तिरेका थिए यो बर्ष भने ३ हजार ७ सय ८० जनाले मात्र अन्नपुर्ण पदमार्गमा भ्रमणको लागि प्रबेश शुल्क तिरेको ए क्यापले जनाएको छ । भूकम्प पछि करीब ९ सय २७ जना पर्यटकहरु अन्नपूर्ण पदमार्गको भ्रमणमा निस्केका छन । पछिल्लो एक हप्तामा मात्र यो सङख्या भने एक सय ६८ रहेको छ । अन्नपूर्ण पदमार्गमा पर्ने पर्यटकीय स्थलहरुको भूकम्पले के कस्तो प्रभाव पार्यो भन्ने बिषयमा ए क्याप र सामर्थ प्रोजेक्टले हेलिकोप्टर मार्फत अध्ययन अवलोकन समेत गरेको छ । अन्नपूर्ण पदमार्गमा पर्ने पर्यटकीय स्थलहरुमा भूकम्पले खासै कुनै प्रभाव नपारेको प्रमुख गुरुङले जनाए ।
अन्नपूर्ण पदमार्गमा पर्ने म्याग्दीको घोरेपानी पुन हिलमा भेटिएका विभिन्न देशका पर्यटकहरु रमाउदै थिए । कोहि सामुहिक तष्विर लिन त कोहि सेल्फी फोटो आफ्नो मोवाइलमा कैद गर्न । समुद्री सतहबाट ३ हजार २ सय १० मिटर उचाइमा रहेको पुन हिलबाट झुल्के घामसंगैको अन्य दृश्य हेर्नेहरुको सधै जसो भिडभाड हुने गर्दछ । वेलायता एक नागरीक क्रिसले नेपालमा भूकम्पको केहि ठाँउमा प्रभाव परे पनि अन्नपूर्ण पदमार्ग सहितका धेरै पर्यटकीय स्थलहरु सुरक्षित रहेको जानकारी पाए लगतैै आफुहरु नेपाल आएको बताए । वेलायतबाट नेपाल भ्रमणमा आएका क्रिस दुई जनाको साथमा ११ दिने भ्रमणमा निस्केका हुन । अमेरीका, न्युजील्याण्ड, वेलायत लगायतका देशहरुले नेपालमा भूकम्प पछि भ्रमणको लागि आफ्ना देशका नागरीकहरुलाई खुल्ला गरेसंगै पर्यटकहरुको सङख्यामा विस्तारै बृद्धि भएको टान क्षेत्रिय संघ पोखराका सदस्य कृष्ण प्रसाद आचार्यले बताए । घान्द्रुक ८ टाढापानीका एक होटल व्यावसायी मन बहादखुर क्षेत्रिका अनुसार भूकम्पले गर्दा करीब दुई महिना जसो शुन्य जस्तै भएको पर्यटकको सङख्यामा पछिल्लो एक हप्ता देखि केहि पर्यटकहरु देखिन थालेका छन ।
यसै विच, पोखरा पर्यटन पूर्नजागरण समिति (पिटिआरसी) ले अन्नपूर्ण पदमार्ग सुरक्षित रहेको जनाएको छ । अन्नपूर्ण क्षेत्रमा भूकम्पले कुनै पर्यटकीय स्थलहरुमा असर नपारेकोले त्यस क्षेत्र पर्यटको लागि सुरक्षित भएको पिटिआसीका संयोजक गणेश बहादुर भट्टराईले बताए । भूकम्प प्राकृतिक विपद भएको बताएका भट्टराईले अर्को सिजनमा पर्यटक आउने गरी सरकार तथा पर्यटन व्यावसायीहरुले आ–आफ्नो क्षेत्रबाट प्रचार प्रसार गर्नु पर्ने बताए ।
