विराटनगर, २०७२ असार १२,
एकताका क्रिकेट खेलाडी उत्पादनका लागि उर्वर भूमि मानिंदै आएको विराटनगरमा पछिल्लो समय यो खेल हराउँदै गएपछि त्यसलाई पुनर्जीवित गर्न यहाँका दुई पूर्वराष्ट्रिय खेलाडी युनिल श्रेष्ठ र अजय राजवंशीले शुक्रबार टी–२० प्रतियोगिता आयोजना गरेका छन् । नगरमा दुई वर्षयता क्रिकेटका कुनै पनि प्रतियोगिताको आयोजना गरिएको थिएन ।
प्रतियोगिताअन्तर्गतको उद्घाटन खेलमा इनरुवा क्रिकेट क्लब गोल्छा स्पोटर्स क्लब विराटनगरलाई ८ विकेटले पराजित गरी क्वाटरफाइनलमा प्रवेश गरेको छ ।
पहिले ब्याटिङ गरेको गोल्छाले १९ ओभर ४ बलमा सबै विकेट गुमाउँदै १ सय २१ रनको चुनौती प्रस्तुत गर्दा इनरुवाले १५ ओभर १ बलमा २ विकेट गुमाएर विजयी रन जोड्यो । उसका लागि सोनु मण्डलले ३२ रन, भोला पण्डित र अजय राजवंशीले समान २८–२८ रन योगदान गरेका थिए ।
यसअघि गोल्छा स्पोटर्सका अजय सहनीले २८ र सिद्धार्थ कावराले २५ रन योगदान गरेका थिए । गोल्छालाई सस्तोमा समेट्न इनरुवाका दुर्गा खड्का र रणवीर साहले समान तीन–तीन विकेट झारेका थिए । यो खेलमा इनरुवाका दुर्गा खड्का म्यान अफ द म्याच भए ।
त्यसैगरी दोस्रो खेलमा भारत विहारको सुरार क्लब न्यु मधुमारा क्रिकेट क्लबलाई ६ विकेटले पन्छाउँदै अन्तिम आठमा पुग्यो । पहिले ब्याटिङ गरेको मधुमाराले १७ ओभर ३ बलमा सबै विकेट गुमाएर प्रस्तुत गरेको ९१ रनको चुनौतीलाई विहारले ८ ओभर ३ बलमा ४ विकेट गुमाएर भेट्टाएको थियो । उसका लागि जितेन्द्र, आलोक विराजले समान २२/२२ रन र अमितले २० रन योगदान गरेका थिए ।
मधुमारालाई सस्तैमा रोक्न विहारका टिपु सुल्तानले ४ र एमानले ३ विकेट झारे ।
स्रोत : कान्तिपुर
